ពលរដ្ឋ៧នាក់ បានក្លាយជាជនសង្ស័យ ករណីព្រួតវាយសម្លាប់បុរសម្នាក់ សង្ស័យជាចោរ បណ្តាលឲ្

ពលរដ្ឋ៧នាក់ បានក្លាយជាជនសង្ស័យ ករណីព្រួតវាយសម្លាប់បុរសម្នាក់ សង្ស័យជាចោរ បណ្តាលឲ្យស្លាប់ នៅកណ្តាលវាលស្រែ

(ព្រៃវែង)៖ ហេតុការណ៍នេះ បានកើតឡើងនៅ ថ្ងៃទី៣០ ខែមីនា ឆ្នាំ២០២៣ ត្រង់ចំណុចវាលស្រែ ស្ថិតក្នុងភូមិតាមូង ឃុំថ្កូវ ស្រុកកំពង់ត្របែក ខេត្តព្រៃវែង។ ប្រជាពលរដ្ឋ៧នាក់ បានក្លាយជាជនសង្ស័យ ក្រោយពីសមត្ថកិច្ចស្រាវជ្រាវរកឃើញថា ពួកគេមានជាប់ពាក់ព័ន្ធនឹងករណីព្រួតវាយបុរសម្នាក់ សង្ស័យជាចោរលួច បណ្តាលឲ្យស្លាប់នៅកណ្តាលវាលស្រែទាំងយប់។
ជនរងគ្រោះឈ្មោះ ឡុង នី អាយុ៦០ឆ្នាំ រស់នៅភូមិតាប្រុយ ឃុំព្រៃពោន ស្រុកកំពង់ត្របែក ខេត្តព្រៃវែង។ ចំណែកជនសង្ស័យមានចំនួន ៧នាក់រួមមាន៖
*ទី១៖ ឈ្មោះ រិន ប្រិមប្រិយ (ហៅកី) អាយុ២៨ឆ្នាំ រស់នៅភូមិតាមូង ឃុំថ្កូវ ស្រុកកំពង់ត្របែក។
*ទី២៖ ឈ្មោះ មុំ ចិត្តា (ហៅចិត្ត) អាយុ២៨ឆ្នាំ រស់នៅភូមិ-ឃុំជាមួយគ្នា។
*ទី៣៖ ឈ្មោះ ប្រាក់ ចំរើន (ហៅធុយ) អាយុ២៣ឆ្នាំ រស់នៅភូមិព្រៃសំរោង ឃុំព្រៃពូន ស្រុកកំពង់ត្របែក។
*ទី៤៖ ឈ្មោះ គង់ វិវឌ្ឍន៍ (ហៅខ្លី) អាយុ២៧ឆ្នាំ រស់នៅភូមិត្រពាំងក្រសាំង ឃុំព្រៃពូន ស្រុកកំពង់ត្របែក។
*ទី៥៖ ឈ្មោះ គង់ សាម៉េត (ហៅម៉េន) អាយុ៣៧ឆ្នាំ រស់នៅភូមិត្រពាំងក្រសាំង ឃុំព្រៃពូន ស្រុកកំពង់ត្របែក។
*ទី៦៖ ឈ្មោះ អ៊ុន វ៉ា (ហៅស្វិត) អាយុ៥២ឆ្នាំ រស់នៅភូមិតាមូង ឃុំថ្កូវ ស្រុកកំពង់ត្របែក
*ទី៧៖ ឈ្មោះ ផង់ ស៊ីណា អាយុ២៤ឆ្នាំ រស់នៅភូមិត្រពាំងក្រសាំង ឃុំព្រៃពូន ស្រុកកំពង់ត្របែក ខេត្តព្រៃវែង។
តាមការបំភ្លឺរបស់ឈ្មោះ អ៊ុន សារៀន ភេទស្រី អាយុ៤៥ឆ្នាំ រស់នៅភូមិតាមូង ឃុំថ្កូវ ស្រុកកំពង់ត្របែក បានឲ្យដឹងថា កាលពីវេលាម៉ោងប្រមាណ ១២យប់ រំលងអាធ្រាត្រ ឈានចូលថ្ងៃទី៣០ ខែមីនា ឆ្នាំ២០២៣ មានចោរចូលផ្ទះរបស់ខ្លួន ពេលឃើញចោរភ្លាម គាត់មានការភិតភ័យពេក ក៏ទូរស័ព្ទទៅប្រាប់បងប្រុសខ្លួនឈ្មោះ រុន រ៉ា អាយុ៥២ឆ្នាំ នៅភូមិជាមួយគ្នា បន្តិចក្រោយមកក៏ឮសំឡេងស្រែកថា ចោរៗព័ទ្ធចាប់ៗ ឮសំឡេងជាច្រើននាក់ តែមិនដឹងថានរណាខ្លះនោះទេ ព្រោះគាត់មិនហ៊ានចេញពីក្នុងផ្ទះ ហើយសំឡេងស្រែកនោះ គឺនៅជាប់របងផ្ទះគាត់ផ្នែកខាងត្បូង។
ក្រោយពីស្រែកព័ទ្ធចាប់ រយៈពេល ១០នាទី បងរបស់ខ្លួនឈ្មោះ អ៊ុន រ៉ា ក៏ចូលក្នុងផ្ទះខ្លួនយកពិលទៅបំភ្លឺដើររកមើលចោរក្នុងដីភូមិទៀត តែមិនឃើញគាត់ក៏ត្រឡប់ទៅវិញ បន្ទាប់មកទៀតបងស្រីខ្លួនឈ្មោះ អ៊ុន សារុំ បានមកដេកជាមួយខ្លួន លុះដល់ម៉ោងប្រហែល ៤ទៅ៥ទៀបភ្លឺ សមត្ថកិច្ចនគរបាលបានស្រែកហៅខ្លួន ឱ្យក្រោកឡើងសួរនាំពីហេតុការណ៍ចោរចូលលួច ខ្លួនបានប្រាប់ថា ចោរចូលលួចតែមិនបានលួចទ្រព្យសម្បត្តិអ្វីនោះទេ។
យោងតាមបំភ្លឺពីសាក្សីនៅជុំវិញកន្លែងកើតហេតុ បានប្រាប់ឱ្យដឹងថា មុនពេលកើតហេតុ គេបានឮសំឡេងស្រែករបស់ម្ចាស់ផ្ទះឈ្មោះ អ៊ុន សារឿន ភេទស្រី ថា មានចោរចូលផ្ទះ និងឃើញក្រុមជនសង្ស័យទាំង៧នាក់ខាងលើ រត់ចេញពីរោងបុណ្យផ្ទះឈ្មោះ ជូ សុផល (ហៅប៉ិល) អាយុ៥៦ឆ្នាំ រស់នៅភូមិតាមូង ឃុំថ្កូវ ស្រុកកំពង់ត្របែក នាំគ្នាទៅព័ទ្ធផ្ទះរបស់ឈ្មោះ អ៊ុន សារឿន។
បន្ទាប់មកពួកគេចាប់ចោរនោះបាន ក៏ធ្វើសកម្មភាពព្រួតវាយបណ្ដាលឲ្យស្លាប់តែម្តង។ ក្រោយពីកើតហេតុ សមត្ថកិច្ចបានចុះធ្វើការស្រាវជ្រាវប្រមូលភស្តុតាង និងឃាត់ខ្លួនជនសង្ស័យទាំង ៧នាក់ ខាងលើ មកសាកសួរ និងកសាងសំណុំរឿងទៅតាមនីតិវិធី។
ជនសង្ស័យទាំង៧នាក់ រួមទាំងវត្ថុតាង សមត្ថកិច្ចជំនាញបានបញ្ជូនទៅសាលាដំបូងខេត្តព្រៃវែង ដើម្បីចាត់ការបន្តតាមនីតិវិធីច្បាប់៕