ឃាត់ខ្លួន មុខសញ្ញារក្សាទុក ជួញដូរ និងប្រើប្រាស់នូវសារធាតុញៀនខុសច្បាប់

ឃាត់ខ្លួន មុខសញ្ញារក្សាទុក ជួញដូរ និងប្រើប្រាស់នូវសារធាតុញៀនខុសច្បាប់

ពោធិ៍សាត់៖ ដោយអនុវត្តតាមមតិចង្អុលការណែនាំរបស់លោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ ស្ដីពីការការពារសន្តិសុខ សណ្ដាប់ធ្នាប់ ជូនប្រជាពលរដ្ឋក្នុងមូលដ្ឋាន ឲ្យបានកាន់តែល្អប្រសើរនោះ កម្លាំងប៉ុស្តិ៍នគរបាលរដ្ឋបាលផ្ទះព្រៃ សហការជាមួយកម្លាំងអន្តរាគមន៍ នៃអធិការដ្ឋាននគរបាលក្រុងពោធិ៍សាត់ ដឹកនាំបញ្ជាផ្ទាល់ដោយលោកវរសេនីយ៍ឯក កែវ សារិ អធិការនគរបាលក្រុងពោធិ៍សាត់ បានចុះល្បាតត្រួតពិនិត្យតាមគោលដៅសំខាន់ៗក្នុងមូលដ្ឋានក្រុងពោធិ៍សាត់ ដោយបានឃើញជន គួរអោយសង្ស័យម្នាក់កំពុងជិះម៉ូតូ ក៏បានធ្វើការឃាត់ខ្លួន ដើម្បីសួរនាំ និងឆែកឆេរ ។ ជាលទ្ធផលឃាត់ខ្លួនបានជនសង្ស័យចំនួន ០១នាក់ និងចាប់យកសម្ភារ:វត្ថុតាងមួយចំនួន និងបន្ដកិច្ចការងាររដ្ឋបាលរហូតឈានដល់ ការឃាត់ខ្លួនជនសង្ស័យ ០៣នាក់ផ្សេងទៀត ។
កម្លាំងអន្តរាគមន៍ នៃអធិការដ្ឋាននគរបាលក្រុងពោធិ៍សាត់ សហការ ជាមួយប៉ុស្តិ៍នគរបាលរដ្ឋបាលផ្ទះព្រៃ ធ្វើការល្បាតក្នុងភូមិសាស្ត្រក៏បានឃើញជនគួរអោយសង្ស័យម្នាក់កំពុងជិះលើម៉ូតូនៅចំណុចផ្លូវកៅស៊ូមុខហាងសុភមង្គល ស្ថិតនៅភូមិក្បាលហុង សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ ភ្លាមនោះកម្លាំងយើងបានឃាត់ខ្លួន ដើម្បីសួរនាំ និងឆែកឆេរ។ ជាលទ្ធផលឃាត់ខ្លួនបានជនសង្ស័យចំនួន ០១នាក់ និងចាប់យកសម្ភារ:វត្ថុតាងដូចខាងក្រោម ៖

១-ឈ្មោះ យស់ វង្សរតនា (ហៅ ជ្រុយ) ភេទប្រុស អាយុ ៣៧ឆ្នាំ មុខរបរ កម្មករ រស់នៅពោធិ៍ដំណាក់ ឃុំវាល ស្រុកកណ្ដៀង ខេត្តពោធិ៍សាត់ ។ (លទ្ធផលតេស្តស្វែងរកសារធាតុញៀនក្នុងទឹកនោមវិជ្ជមាន+)។ វត្ថុតាងចាប់យកបានរួមមាន៖ ម្សៅក្រាមពណ៌ សថ្លា សង្ស័យជាសារធាតុញៀនចំនួន ០១កញ្ចប់(សាច់ថ្នាំសុទ្ធ ០.៥២ ក្រាម), ទូរស័ព្ទចំនួន ០១គ្រឿង ម៉ាក Vivo ពណ៍ខៀវ និងថង់សំរាប់ច្រកគ្រឿងញៀនមួយចំនួន ។
បន្ទាប់ពីសមត្ថកិច្ចជំនាញផ្នែកប្រឆាំងគ្រឿងញៀននៃអធិការដ្ឋាននគរបាលក្រុងពោធិ៍សាត់ បានស្រង់ចម្លើយរបស់ ឈ្មោះ យស់ វង្សរតនា ដោយសារភាពថាខ្លួនបានទិញថ្នាំញៀន ពីឈ្មោះ ចាប វុទ្ធី ។ ក្រោយមកនៅវេលាម៉ោង ១៦ និង០០នាទី សមត្ថកិច្ចយើងបានអោយឈ្មោះ យស់ វង្សរតនា យកទូរសព្ទខលទៅទិញថ្នាំញៀនពី ឈ្មោះ ចាប វុទ្ធី ចំនួន ១១០០ ០០០រៀល (មួយលាន ដប់ម៉ឺនរៀល) ដោយឈ្មោះ វុទ្ធី អោយទៅចាំយកថ្នាំនៅក្រោមស្ពានអាកាស ស្ថិតនៅភូមិពោធិ៍ដំណាក់ ឃុំវាល ស្រុកកណ្ដៀង ខេត្តពោធិ៍សាត់ ។ ជាលទ្ធផលឃាត់ខ្លួនបានជនសង្ស័យចំនួន ០២នាក់ និងចាប់យកសម្ភារ:វត្ថុតាងដូចខាងក្រោម៖
២.ឈ្មោះ ចាប វុទ្ធី ភេទប្រុស អាយុ ៣២ឆ្នាំ មុខរបរមិនពិតប្រាកដ រស់នៅភូមិផ្ទះព្រៃ សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ ។ (លទ្ធផលតេស្តស្វែងរកសារធាតុញៀនក្នុងទឹកនោមវិជ្ជមាន +)។
៣.ឈ្មោះ ជា សុភ័ក្រ្ដ ភេទប្រុស អាយុ ៣០ឆ្នាំ មុខរបរ នៅផ្ទះ រស់នៅភូមិប្រឡាយធំ ឃុំវាល ស្រុកកណ្ដៀង ខេត្តពោធិ៍សាត់ ។ (លទ្ធផលតេស្តស្វែងរកសារធាតុញៀនក្នុងទឹកនោមវិជ្ជមាន +)។
ការឆែកឆេរភ្លាមៗលើខ្លួនមានដូចជា៖ ម៉ូតូចំនួន ០១គ្រឿង ម៉ាកហុងដាឌ្រីម ពណ៌ខ្មៅ(មិនចាំឆ្នាំ), ទូរស័ព្ទចំនួន ០២គ្រឿង(១.ម៉ាក Redmi ពណ៌ស ចំនួន ០១គ្រឿង, ២.ម៉ាក Nokia ចុចពិលចំនួន ០១គ្រឿង) ។
បន្ទាប់មកសមត្ថកិច្ចយើងបានបន្ដទៅឆែកឆេរ បន្ទប់ជួលរបស់ឈ្មោះ ចាប វុទ្ធី ដែលស្ថិតនៅភូមិបាក់រទះ សង្កាត់ព្រៃញី ក្រុងពោធិ៍សាត់ ខេត្តពោធិ៍សាត់ និងជនសង្ស័យទី៤ ដែលកំពុងនៅបន្ទប់ជួលនោះ ឈ្មោះ កែវ ដែន ភេទស្រី អាយុ ២៨ឆ្នាំ មុខរបរ ធ្វើការរត់តុ ។ (លទ្ធផលតេស្តស្វែងរកសារធាតុញៀនក្នុងទឹកនោមវិជ្ជមាន+)។ វត្ថុតាងឆែកឆេរ ចាប់យកបានរួមមាន៖ ម្សៅក្រាមពណ៌សថ្លា សង្ស័យជាសារធាតុញៀនចំនួន ០១កញ្ចប់(សាច់ថ្នាំសុទ្ធ ០.៤២ក្រាម), ដែកកេះកែឆ្នៃសម្រាប់ជក់ថ្នាំញៀនចំនួន ០២ដើម និង ឧបករណ៍សម្រាប់ជក់គ្រឿងញៀនចំនួន ០១កំផ្លេរ ។

សមត្ថកិច្ចយើងក៏បន្តទៅធ្វើការឆែកឆេរនៅផ្ទះរបស់ ឈ្មោះ ចាប វុទ្ធី ផ្ទាល់បន្ដទៀត ដែលស្ថិតនៅភូមិផ្ទះព្រៃ សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ ។ ជាលទ្ធផលឆែកឆេររកឃើញសម្ភារ:វត្ថុតាងដូចជា៖ ម្សៅក្រាមពណ៌សថ្លាសង្ស័យជាសារធាតុញៀនចំនួន ០១កញ្ចប់ (សាច់ថ្នាំសុទ្ធ ២.០៩ក្រាម), ដែកកេះកែឆ្នៃសម្រាប់ជក់ថ្នាំញៀនចំនួន ០១ដើម, ឧបករណ៍សម្រាប់ជក់គ្រឿងញៀនចំនួន ០១កំផ្លេរ និងថង់ច្រកសម្រាប់គ្រឿងញៀនមួយចំនួន ។
ជនសង្ស័យទាំង ០៤នាក់ រួមជាមួយវត្ថុតាង សមត្ថកិច្ចយើងឃាត់ខ្លួននៅអធិការដ្ឋាននគរបាលក្រុងពោធិ៍សាត់ ដើម្បីចាត់ការតាមនិតិវិធីច្បាប់ ៕