ស្ត្រីម្នាក់ត្រូវចោរឆក់ខ្សែក បណ្ដាលឲ្យដួលសន្លប់ ខណៈដែលគាត់ជិះកង់អាគុយ ត្រលប់មកពីទិញម្ហូបនៅផ្សារទៅផ្ទះ ស្រាប់តែមានជនសង្ស័យ២នាក់ជិះម៉ូតូ ដេញតាមឆក់ខ្សែក បណ្ដាលឲ្យគាត់ដួលបោកផ្ទប់ថ្នល់

ស្ត្រីម្នាក់ត្រូវចោរឆក់ខ្សែក បណ្ដាលឲ្យដួលសន្លប់ ខណៈដែលគាត់ជិះកង់អាគុយ ត្រលប់មកពីទិញម្ហូបនៅផ្សារទៅផ្ទះ ស្រាប់តែមានជនសង្ស័យ២នាក់ជិះម៉ូតូ ដេញតាមឆក់ខ្សែក បណ្ដាលឲ្យគាត់ដួលបោកផ្ទប់ថ្នល់

(ភ្នំពេញ)៖ កាលពី ល្ងាច ថ្ងៃទី៤ ខែធ្នូ ឆ្នាំ២០២៤ នៅតាមផ្លូវបេតុងភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
ស្រ្តីចំណាស់ម្នាក់ បានរងរបួសធ្ងន់សន្លប់បាត់ស្មារតី ខណៈដែលគាត់ជិះកង់អាគុយ ត្រលប់មកពីទិញម្ហូបនៅផ្សារទៅផ្ទះ ស្រាប់តែមានជនសង្ស័យ២នាក់ជិះម៉ូតូ ដេញតាមឆក់ខ្សែក បណ្ដាលឲ្យគាត់ដួលបោកផ្ទប់ថ្នល់ ហើយជនសង្ស័យយកខ្សែក បាន១កំណាត់រួចគេចខ្លួនបាត់ស្រមោល ។
តាមប្រភពពីកន្លែងកើតហេតុ បានឲ្យដឹងថា ជនរងគ្រោះឈ្មោះស៊ឹម ភួន ភេទស្រី អាយុ៦០ឆ្នាំ មានទីលំនៅភូមិព្រៃសណ្ដែក សង្កាត់ចោមចៅទី២ ខណ្ឌពោធិ៍សែនជ័យ ហើយនៅមុនពេល កើតហេតុគាត់បានជិះកង់អាគុយ មកពីទិញបន្លែ និងសាច់ ព្រមទាំងពងមាន់នៅផ្សារឆ្ពោះទៅផ្ទះ ដោយធ្វើដំណើរតាមបណ្តោយផ្លូវបេតុងភូមិជ្រៃកោង ក្នុងទិសដៅពីជើងទៅត្បូង។
ខណៈនោះ គាត់ក៏មានពាក់ខ្សែកមាស១ខ្សែផងដែរ លុះពេលទៅដល់ត្រង់ចំណុចកើតហេតុខាងលើ ក៏ស្រាប់តែមានជនសង្ស័យ២នាក់ ជិះម៉ូតូម៉ាក់ Honda Zoomer-X មិនចាំស្លាកលេខ១គ្រឿង ទៅពីក្រោយឆក់ខ្សែក បណ្ដាលឲ្យគាត់ដួលរងរបួសធ្ងន់តែម្ដង។

ប្រភពដដែល បានឲ្យដឹងទៀតថា ខ្សែកមាសនោះ ទម្ងន់ប្រហែល៣ជី ហើយខណៈនោះ ជនសង្ស័យឆក់យកបានតែ១កំណាត់ប៉ុណ្ណោះ ចំណែក១កំណាត់ទៀត ដាច់នៅជាប់កជនរងគ្រោះ។
បន្ទាប់មកជនសង្ស័យបានជិះម៉ូតូគេចខ្លួនបាត់ ក្រោយពេលកើតហេតុក្រុមសង្រ្គោះអង្គភាព៧១១ បានចេញទៅដឹកយកជនរងគ្រោះ ទៅកាន់មន្ទីរពេទ្យដើម្បីសង្រ្គោះបន្ទាន់៕