ស្ត្រីម្នាក់ ជួយលក់ឡេ បន្លំលួចលុយម្ដងបន្តិចៗ រហូតបានជាង១ម៉ឺនដុល្លារ សមត្ថកិច្ចឃាត់ខ្លួន
ស្ត្រីម្នាក់ ជួយលក់ឡេ បន្លំលួចលុយម្ដងបន្តិចៗ រហូតបានជាង១ម៉ឺនដុល្លារ សមត្ថកិច្ចឃាត់ខ្លួន
បន្ទាយមានជ័យ ៖ ស្ត្រីម្នាក់ជួយទិញឡេ រហូតបានស្គាល់គ្នាក្លាយជាមិត្តសំឡាញ់រាប់អានគ្នាដូចបងប្អូនបង្កើតជាមួយអ្នកលក់ ក៏មានគំនិតលក់កាហ្វេនៅមុខតូបលក់ឥវ៉ាន់ឡេ ដើម្បីឆ្លៀតឱកាសបន្លំលួចលុយក្នុងថតតុម្ដងបន្តិចៗ រហូតបានដល់ជាង១ម៉ឺនដុល្លារ។
ឈ្មោះ ឡម ចិន្ដា បានបបួលទៅលេងនៅក្រុងប៉ោយប៉ែត ពេលត្រឡប់មកវិញ មិនឃើញឈ្មោះ ឡម ចិន្ដា មកលក់កាហ្វេនៅមុខតូបទៀតទេ ដោយមានការសង្ស័យ បានឆែកមើលកាមេរ៉ាសុវត្ថិភាពស្រាប់តែឃើញឈ្មោះ ឡម ចិន្ដា ធ្វើសកម្មភាពលួចយកប្រាក់របស់ដែលទុកក្នុងថតតុនៅក្នុងផ្ទះជាប្រចាំ សរុបជាប្រាក់ដែលបាត់អស់ប្រហែល១ម៉ឺនដុល្លារ ទើបមកដាក់ពាក្យបណ្ដឹងនៅមូលដ្ឋានកងរាជអាវុធហត្ថក្រុងតែម្ដង។
ក្រោយទទួលបានពាក្យបណ្ដឹង និងមានភស្ដុតាង រូបភាពវីដេអូកាមេរ៉ាសុវត្ថិភាពផង កម្លាំងមូលដ្ឋានកងរាជអាវុធហត្ថក្រុងបានធ្វើពាក្យស្នើសុំបើកការស៊ើបអង្កេតមកការិយាល័យព្រហ្មទណ្ឌកងរាជអាវុធហត្ថខេត្ត ដើម្បីរៀបចំនីតិវិធីបន្តទៅអយ្យការ អមសាលាដំបូងខេត្តបន្ទាយមានជ័យ។ បន្ទប់ពីទទួលបានដីកាសម្រេចឱ្យបើកការស៊ើបអង្កេតបឋម លេខ ០៨.អ.យ.ក ចុះថ្ងៃទី៩ ខែមករា ឆ្នាំ២០២៥ របស់ លោក កើត វណ្ណារ៉េត ព្រះរាជអាជ្ញា នៃអយ្យកាអមសាលាដំបូងខេត្ត កម្លាំងជំនាញកងរាជអាវុធហត្ថក្រុងបានធ្វើការកោះហៅឈ្មោះ ឡម ចិន្ដា ភេទស្រី អាយុ២៦ឆ្នាំ ស្នាក់នៅភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ចូលមកឆ្លើយបំភ្លឺលើករណីខាងលើ នៅមូលដ្ឋានកងរាជអាវុធហត្ថក្រុងសិរីសោភ័ណ នាថ្ងៃទី១៤ ខែមករា ឆ្នាំ២០២៥ តែឈ្មោះ ឡម ចិន្ដា បានឆ្លើយបដិសេធនូវទង្វើរបស់ខ្លួនដែលបានប្រព្រឹត្តដូចមានក្នុងវីដេអូកាមេរ៉ាសុវត្ថិភាពរបស់ដើមបណ្ដឹងឈ្មោះ នឿន វន្នី។
លោកវរសេនីយ៍ត្រី សុខ ឡេង បានឱ្យដឹងទៀតថា ទោះបីឈ្មោះ ឡម ចិន្ដា មិនទទួលស្គាល់លើភស្ដុតាងរូបថតកាមេរ៉ាសុវត្ថិភាពក៏ដោយ កម្លាំងជំនាញរបស់ខ្លួនបានកសាងសំណុំរឿង តាមនីតិវិធីបញ្ជូនមកកាន់ការិយាល័យព្រហ្មទណ្ឌកងរាជអាវុធហត្ថខេត្តចាត់ការបន្តតាមដីកាសម្រេចឱ្យបើកការស៊ើបអង្កេតរបស់អយ្យកាអមសាលាដំបូងខេត្តបន្ត។
ឃាត់ខ្លួនករណីនេះ ដោយទទួលបានការអនុញ្ញាតពី លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលពី លោក កើត វណ្ណារ៉េត ព្រះរាជអាជ្ញា អមសាលាដំបូងខេត្ត ជនសង្ស័យត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្តបញ្ជូនទៅសាលាដំបូងខេត្តហើយ នៅថ្ងៃ ទី១៥ ខែមករា ឆ្នាំ២០២៥ ដើម្បីអនុវត្តតាមនីតិវិធីច្បាប់៕