ក្មេងស្ទាវមួយក្រុមដេញកាប់គ្នា តាមផ្លូវជាតិលេខ២ នៅស្រុកទ្រាំង ខេត្តតាកែវ សិស្សសាលាម្នាក់ស្លាប់នៅកន្លែងកើតហេតុ ដែលមិនពាក់ព័ន្ធនឹងជម្លោះសោះ

ក្មេងស្ទាវមួយក្រុមដេញកាប់គ្នា តាមផ្លូវជាតិលេខ២ នៅស្រុកទ្រាំង ខេត្តតាកែវ សិស្សសាលាម្នាក់ស្លាប់នៅកន្លែងកើតហេតុ ដែលមិនពាក់ព័ន្ធនឹងជម្លោះសោះ

(តាកែវ)៖ ហេតុការណ៍នេះ កើតឡើងនៅរសៀលថ្ងៃទី០៣ ខែកុម្ភៈ ឆ្នាំ២០២៣ នៅតាមបណ្ដោយផ្លូវជាតិលេខ២ ស្ថិតក្នុងភូមិឈើទាលភ្លោះ ឃុំ៨មុំ ស្រុកទ្រាំង ខេត្តតាកែវ។ ក្មេងស្ទាវមួយក្រុមជិះម៉ូតូ៣គ្រឿង ដេញកាប់គ្នាយ៉ាងអនាធិបតេយ្យ បណ្ដាលឲ្យម្នាក់ស្លាប់ក្នុងថ្លុកឈាមដោយត្រូវមួយកាំបិតប៉័ងតោ។
មុនពេលកើតហេតុមានជនសង្ស័យមួយក្រុមជិះម៉ូតូ៣គ្រឿង មានគ្នាប្រហែល៦នាក់ ជិះមកពីទិសខាងជើង ប្រដាប់ដោយកាំបិប៉័ងតោ បានកាប់ទៅលើជនរងគ្រោះពីរនាក់ ជិះម៉ូតូស្របទិសគ្នាពីជើងទៅទិសខាងត្បូង តែកាប់មិនត្រូវ។
បន្ទាប់មកជនសង្ស័យទាំងនោះ បានជិះទៅទិសខាងត្បូងធ្វើសកម្មភាពកាប់ទៅលើជនរងគ្រោះឈ្មោះ ប៉ែត កុសលសិទ្ធិ អាយុ១៧ឆ្នាំ រស់នៅភូមិ បន្ទាយ ឃុំជីខ្មា ស្រុកទ្រាំង ដែលកំពុងជិះម៉ូតូម្នាក់ឯងស្របទិសគ្នា ដោយគ្មានមូលហេតុ ត្រូវត្រង់កផ្នែកខាងឆ្វេង ស្លាប់កន្លែងកើតហេតុ។ ក្រោយធ្វើសកម្មភាពជនសង្ស័យបានជិះម៉ូតូទៅទិសខាងត្បូងគេចខ្លួនបាត់។
កម្លាំងនគរបាលស្រុក បានសហការជាមួយកម្លាំងការិយាល័យជំនាញ ធ្វើការស្រាវជ្រាវស្វែងរកជនសង្ស័យ ដើម្បីយកមកផ្តន្ទាទោសតាមច្បាប់ ចំណែកសាកសពជនរងគ្រោះត្រូវសមត្ថកិច្ចប្រគល់ជូន ក្រុមគ្រួសារយកទៅធ្វើបុណ្យតាមប្រពៃណី។
ករណីនេះ ប្រជាពលរដ្ឋបានធ្វើការទទូចដល់សមត្ថកិច្ចជួយស្វែងរកក្រុមជនដៃដល់ យកមកផ្តន្ទាទោសតាមផ្លូវច្បាប់ឲ្យបានជាដាច់ខាត ព្រោះបើនៅតែបណ្តោយឲ្យក្រុមក្មេងទំនើងទាំងនេះនៅធ្វើសកម្មភាព អនាធិបតេយ្យបែបនេះបន្តទៀត គាត់គិតថាភូមិ ឃុំ គឺអសន្តិសុខពេកហើយ៕