រដ្ឋលេខាធិការក្រសួងកសិកម្ម ជំរុញដល់មន្រ្តីជំនាញ ត្រូវបង្កើតផ្ទះសំណាញ់សុវត្ថិភាពបន្ថែមទៀត ដើម្បីជួយបង្កើនប្រសិទ្ឋភាពការងារកសិកម្មទាំងបរិមាណ និងគុណភាព ថែមទាំងជួយដល់សុខមាលភាព
រដ្ឋលេខាធិការក្រសួងកសិកម្ម ជំរុញដល់មន្រ្តីជំនាញ ត្រូវបង្កើតផ្ទះសំណាញ់សុវត្ថិភាពបន្ថែមទៀត ដើម្បីជួយបង្កើនប្រសិទ្ឋភាពការងារកសិកម្មទាំងបរិមាណ និងគុណភាព ថែមទាំងជួយដល់សុខមាលភាព
ខេត្តមណ្ឌលគិរី៖ ឯកឧត្តម ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានថ្លែងក្នុងពិធីបិទសន្និបាតបូកសរុបលទ្ឋផលការងារឆ្នាំ២០២២ និងលើកទិសដៅបន្តឆ្នាំ២០២៣ ដោយមានការចូលរួមពីសំណាក់ឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត ឯកឧត្តម ថង សាវុន អភិបាលខេត្ត លោក ប្រធានសាលាដំបូងខេត្ត លោក ព្រះរាជអាជ្ញាអមសាលាដំបូងខេត្ត រួមទាំងមន្រ្តីរាជការ និងអភិបាលក្រុង/ស្រុកជាច្រើនរូប ដែលប្រព្រឹត្តទៅនៅសាលប្រជុំមន្ទីរកសិកម្ម រុក្ខាប្រមាញ់និងនេសាទខេត្តមណ្ឌលគិរី នាព្រឹកថ្ងៃទី០៨ កុម្ភៈ ២០២៣។
ឯកឧត្តម ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានថ្លែងការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្ទីរកសិកម្ម រុក្ខាប្រមាញ់ និងនេសាទ កន្លងមកបានល្អប្រសើរ។ ឯកឧត្តម បញ្ជាក់ថា គោលបំណង ដើម្បីធ្វើការបូកសរុបត្រួតពិនិត្យឡើងវិញ និងធ្វើការឆ្លុះបញ្ចាំងនូវលទ្ធផលសកម្មភាពការងារដែលបានអនុវត្តនៅ ក្នុងឆ្នាំ២០២២ កន្លងមក ភាពងាយស្រួល បញ្ហាប្រឈម ដំណោះស្រាយ និងលើកទិសដៅបន្តអនុវត្តនៅក្នុងឆ្នាំ២០២៣ខាងមុខ របស់មន្ទីរកសិកម្មខេត្ត ។ ទន្ទឹមនឹងនេះ ឯកឧត្តម បានណែនាំដល់ថ្នាក់ដឹកនាំ និងមន្ដ្រី រាជការគ្រប់លំដាប់ថ្នាក់នៃមន្ទីរកសិកម្ម ត្រូវបន្តខិតខំប្រឹងប្រែង យកចិត្តទុកដាក់បន្ថែមទៀត ក្នុងការអនុវត្តវិស័យកសិកម្មនៅក្នុងខេត្ត ឱ្យមានការរីកច្រើន។
ឯកឧត្តម ថង សាវុន អភិបាលខេត្តមណ្ឌលគិរី បានមានប្រសាសន៍ថា វិស័យកសិកម្ម រុក្ខាប្រមាញ់ និងនេសាទ នៅក្នុងឆ្នាំ២០២២ កន្លងមកឃើញថា កិច្ចការងារក្នុងវិស័យកសិកម្ម កសិ-ឧស្សាហកម្ម ការងារព្រៃឈើ និងការងារជលផល។ល។ មានការអនុវត្តបានយ៉ាងល្អប្រសើរ ពីមន្ត្រីជំនាញគ្រប់លំដាប់ថ្នាក់ បានចូលរួមយ៉ាងសកម្ម ក្នុងការអនុវត្តការងារទទួលបានលទ្ធផលល្អគួរជាទីមោទនៈ។ ឯកឧត្តម អភិបាលខេត្តបន្តថា ដំណាំសំខាន់ៗ លើការងារដាំដុះផ្សេងៗ ដូចជា ដំណាំស្រូវស្រែ ស្រូវចំការបុកដាំ ដំណាំឧស្សាហកម្ម ដំណាំរួមផ្សំ ដំណាំអចិន្ត្រៃយ៍ បើធៀបនឹង ឆ្នាំមុនគឺមានការកើនឡើង ការងារទប់ស្កាត់ និងបង្ការការឆ្លងរីករាលដាលជំងឺសត្វ គឺអនុវត្តបានល្អប្រសើរ ដោយយើងបានធ្វើការទប់ស្កាត់បានទាន់ពេលវេលា ការទប់ស្កាត់ បង្ក្រាបបទល្មើសព្រៃឈើ សត្វព្រៃ និងជលផល អនុវត្តបានយ៉ាងល្អប្រសើរ ដោយមានការខិតខំប្រឹងប្រែងរបស់មន្ត្រីជំនាញក្រោមការដឹកនាំ និងចង្អុលបង្ហាញរបស់គណៈបញ្ជាការឯកភាពខេត្ត និងការងារកិច្ចសហប្រតិបត្តិការជាមួយក្រុមហ៊ុនសម្បទានដីសេដ្ឋកិច្ច ដោយបានជួយសម្របសម្រួល និងបង្កលក្ខណៈ ងាយស្រួលដល់ការវិនិយោគរបស់ក្រុមហ៊ុន។
ក្នុងពិធីនេះដែរ ក៏មានការបំពាក់មេដាយជូនដល់មន្ត្រីនៃមន្ទីរកសិកម្ម ដែលមានស្នាដៃក្នុងការបំពេញការងារនាពេលកន្លងមកផងដែរ៕