អាជីវករផ្សារព្រំជើងជាច្រើននាក់ កំពុងលង់ខ្លួនខាតបង់ ប្រាក់ ជាច្រើនលានរៀល ក្រោយមេតុងទីន មិនទទួលខុសត្រូវ ប្រមូលលុយពីកូនៗ អស់ហើយ រត់គេចខ្លួន បាត់ស្រមោល

អាជីវករផ្សារព្រំជើងជាច្រើននាក់ កំពុងលង់ខ្លួនខាតបង់ ប្រាក់ ជាច្រើនលានរៀល ក្រោយមេតុងទីន មិនទទួលខុសត្រូវ ប្រមូលលុយពីកូនៗ អស់ហើយ រត់គេចខ្លួន បាត់ស្រមោល

ប៉ៃលិន ៖ នៅថ្ងៃទី ២៨ ខែមេសា ឆ្នាំ២០២៣ នេះ ជនរងគ្រោះ ជាកូនតុងទីន បានលើកឡើងថា ករណីមេតុងទីន ជាអាជីវករដូចគ្នា បានឆបោកលុយ ពីកូនៗទាំងអស់ ចំនួន ២១ នាក់សរុបជាទឹកប្រាក់ ប្រមាណជាជិត ១២ ម៉ឺនដុល្លាអាមេរិក។
ករណីរំលោភលើទំនុកចិត្ត ឆបោកលុយពីកូនតុងទីន សរុបចំនួន ២១ នាក់ បានបង្ក ការភ្ញាក់ផ្អើលជាខ្លាំង ក្រោយក្រុមអាជីវករ ក្នុងផ្សារព្រំជើង បានចូលដាក់ពាក្យបណ្តឹង ដល់សមត្ថកិច្ចនប៉ុស្តិ៍នគរបាលរដ្ឋបាលស្ទឹងកាច់ កាលពីពេលថ្មីៗ កន្លងទៅនេះ។

មុនពេលកើតហេតុ ក្រោយជនសង្ស័យ និងក្រុមគ្រួសារ បានប្រមូលលុយពីកូនៗ អស់ហើយ និងស្របពេលបុណ្យចូលឆ្នាំខ្មែរមកដល់ទៀត ជនសង្ស័យ បានយកលេសប្រាប់កូនតុងទីន និងអ្នកជិតខាងជាច្រើនថា ទៅលេងស្រុកកំណើត ៣–៤ ថ្ងៃ ប៉ុន្តែបាត់ដំណឹងរហូតជាច្រើនថ្ងៃ មិនឃើញវិលត្រឡប់មកវិញ ថែមទាំង ម៉េសសិនជើ ហ្វេសប៊ុក (Messenger Facebook) ទាក់ទងគ្នាលែងបាន រួមទាំងលេខ ទូរស័ព្ទ ក៏ចុចមិនចូល ទើបដឹងថា មេតុងទីន បោកលុយ ហើយរត់គេខ្លួន។

ប្រភពនេះ បានបន្ថែមថា មេតុងទីនដែលឆបោកប្រមូលលុយពីកូនៗ មានឈ្មោះ សួ ម៉ាឌីណា ភេទស្រី អាយុ ២៨ ឆ្នាំ រស់នៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន មុខរបរ អ្នកលក់ដូរ នៅក្នុងផ្សារតាប៉ាច ហៅផ្សារ ព្រំជើង។
ជនរងគ្រោះ ជាកូនតុងទីន បានប្រាប់ឲ្យដឹងថា មកទល់ពេលនេះ រឿងឈ្មោះ សួ ម៉ាឌីណា បោកលុយកូនតុងទីន ជិត ១២ ម៉ឺនដុល្លារ នៅមិនទាន់មានពន្លឺនៅឡើយ ចំណែកកម្លាំងផែននគរបាលយុត្តិធម៌ សហការជាមួយកម្លាំងប៉ុស្តិ៍នគរបាលរដ្ឋបាលស្ទឹងកាច់ កំពុងបន្តស្រាវជ្រាវ តាមរកមុខសញ្ញា ដើម្បីអនុវត្តច្បាប់៕